Xeración /AGN (Santiago).
O Sindicato Labrego Galego (SLG) anunciou que emprenderá unha serie de mobilizacións contra a creación dunha Zona Especial de Protección de Aves (ZEPA) a comarca ourensá de A Limia. O responsable do sindicato agrario na localidade, Anxo Pérez, manifestou que despois de “procurar un diálogo non frutífero” co Conselleiro de Medio Ambiente e o Director Xeral de Conservación da Natureza, os agricultores comezarán as súas protestas “en canto terminen de recoller o cereal das súas terras de cultivo”.
O sindicato denuncia que a creación da ZEPA nesta comarca ourensá dificultaría a evolución das explotacións agrarias e a “paralización das obras de ampliación do sistema de regadío, que se atopa en pleno proceso de modernización”.
Anxo Pérez reclamou información ás institucións da Xunta e asegurou que agora “xa é tarde porque temos un mes para facer as alegacións”.
Proxecto polémico
A ZEPA da Limia abarcará 10.634 hectáreas e dende que o pasado 13 de xullo os agricultores amosaron o seu descontento, xa que consideran que haberán importantes perdas en cultivos como o do cereal e restricións no uso de produtos fitosanitarios.
Pola súa parte, Medio Ambiente afirmou no seu momento que “non terá ningún impacto negativo” e que “nunca se lle deu a espalda á participación dos veciños neste proxecto”. Explicaron tamén que este novo espazo é compatible con actividades tradicionais, xa que favorecen a creación dos hábitats precisos.
A Consellería adoptou esta decisión co fin de que Galicia cumpla coas esixencias da Unión Europea, que condenou recentemente a España por dispor de insuficientes hábitats de interese para a conservación de aves.
08/08/2007
