Anxa Correa. AGN (Santiago).
O autor de cómic, ilustrador e pintor vigués Jacobo Fernández, é o gañador da terceira edición do premio Banda Deseñada Castelao, convocado pola Deputación da Coruña e dotado con 6.500 euros e a publicación da obra.
O presidente da Deputación, Salvador Fernández Moreda, anunciou hoxe na Coruña o fallo do xurado, que elixiu por unanimidade distinguir o autor pola obra 'Aventuras de Cacauequi' de entre os oito candidatos.
O xurado concedeu tamén un accésit, aínda que non trascendeu aos medios o nome do autor, xa que a organización non puido contactar previamente con el.
Composto pola deputada responsable de Cultura, Caridad González; o gañador da anterior edición, Antonio Seijas, e os autores Miguelanxo Prado, Agustín Fernández Paz, Ángel de la Calle e Carlos Portela, o xurado valorou a obra por ofrecer "unha historia na que o autor crea un mundo propio e orixinal, tanto no plano artístico como narrativo".
Algo diferente
A historia destaca por estar narrada cunha estrutura "novidosa" e por crear un mundo fantástico que reflicte "unha ollada inxenua e madura a un tempo, non exenta de amargura, sobre as relacións humanas".
A orixinalidade plástica da proposta, que "bebe das fontes clásicas da ilustración, sabiamente asimiladas", foi outro dos factores que xogaron a favor da obra de Fernández.
Sobre o autor
Nado en Vigo en 1971, Jacobo Fernández é licenciado en Belas Artes pola Universidade Complutense de Madrid en 1994 e creador da serie dos 'Arquivos de Archimboldo Roque' para a revista Golfiño.
As súas creacións formarán parte dunha exposición que se exhibirá no Kiosco Alfonso da Coruña no transcurso da nova edición de 'Viñetas desde o Atlántico'.
No Salón presentarase a obra gañadora da segunda edición do premio Castelao, 'Un home feliz', de Antonio Seijas.
O premio Banda Deseñada Castelao é un máis dos certames que convoca a Deputación da Coruña para apoiar a novos creadores da plástica e impulsar a creación nos eidos da literatura, a poesía, a fotografía, o ensaio histórico e as artesanías.
02/08/2007
