Xeración Dixital

O xuiz da Audiencia Nacional, Juan del Olmo, prohibiu a venda do último número da revista satírica El Jueves a petición da Fiscalía Xeral do Estado. Ordenou a súa retirada dos quioscos por un suposto delito de inxurias contra a Coroa española.

O exemplar que motivou a polémica amosaba na portada unha caricatura dos príncipes practicando sexo baixo un titular que facía alusión ás axudas de 2.500 euros por neno recentemente anunciadas polo Goberno. O diálogo da viñeta dicía "Daste conta se quedas preñada? Vai ser o máis parecido a traballar que fixen na vida."

O certo é que a polémica portada se estendeu como un regueiro de pólvora pola rede, e a noticia, na maioría dos casos acompañada de imaxe, aparece en multitude de medios de comunicación xeralistas e bitácoras persoais.

Reaccións
Ademais, as reaccións sobre se a actuación xudicial foi correcta ou esaxerada non se fixeron esperar e xorden voces dende todos os lados. Esquerda Unida, ERC, ou Comisións Obreiras manifestaron que a decisión de Del Olmo foi "excesiva e pon en cuestión a liberdade de expresión".

A Federación de Sindicatos de Periodistas (FeSP), á que pertence o Sindicato de Xornalistas de Galicia manifestou tamén o seu rexeitamento á medida de secuestrar os exemplares da revista, que calificou de "desproporcionada posto que afecta a toda unha publicación e, por tanto, ao dereito á información". O sindicato recalcou que "aínda no suposto de haber unha extralimitación, atentado á honra ou delito de ofensas, a vía axeitada sería a demanda xudicial, nunca o secuestro da publicación".

O Colexio de Xornalistas sumouse tamén ás críticas á decisión xudicial ao considerar que esta supón "un ataque frontal contra a liberdade de expresión, de creación e de ideoloxía dese medio de comunicación". Lembra que El Jueves "non é un medio de información que teña que aterse á realidade duns feitos; como toda publicación satírica o que fai é unha interpretación propia, racional ou irracional, desa realidade".

Na aba oposta, asociacións de xuristas como Xuíces para a democracia ou a Asociación Profesional da Maxistratura fixeron público o seu apoio á actuación de Del Olmo, por considerala "razoada e prudente" dende o punto de vista de que "a liberdade de expresión ten o seu límite no dereito ao honor".