Xeración (Santiago).
En toda España localizáronse ata o de agora un total de 284 fosas da época da Guerra Civil e da ditadura. Son datos feitos públicos polo médico forense Fernando Serrulla na 'Xuntanza de proxectos de investigación sobre o estudo da represión franquista', que durante esta semana se celebra na Facultade de Xeografía e Historia de Santiago.
Serrulla informou ademais de que un grupo de familiares de vítimas da guerra e da represión franquista reclama saber o paradeiro dos 2.267 desaparecidos naquela época, e que en Galicia xa se investigaron fosas en O Vicedo, Soutadouro, Villarrube e Valdoviño.
Outro dos ponentes do encontro, Santiago Macías, falou sobre os traballos que a Asociación para a Recuperación da Memoria Histórica (ARMH), está a realizar na exhumación de cadáveres. Destacou as investigacións na fosa central da Fonsagrada, onde foi atopado o corpo do primeiro comandante asasinado sen xuízo polo réxime franquista, José Moreno Torres, e outros quince compañeiros.
Estas xornadas, que comezaron onte, reúnen a grupos de todo o Estado en torno á análise da memoria histórica. Nelas, estase a pór de manifesto a necesidade de investigar a represión franquista a través da creación de equipos interdisciplinares formados por antropólogos, arqueólogos, historiadores, documentalistas e avogados que poidan esclarecer o que aconteceu no pasado.
Mañá mércores celebrarase a última sesión dos encontros, que estará centrada no tratamento das fontes orais e que contará coa participación de especialistas de Barcelona, Sevilla, Oviedo e Santiago.
17/07/2007
