Xeración Dixital

Alberto Núñez Feijoo é un vigués máis dos que naceu en Ourense (1961). No 2006, substituiu a Manuel Fraga á fronte do PPdeG con tres obxectivos, “sumar, seguir e gañar”. Hoxe, ano e medio despois, aínda mantén presentes estes criterios e asegura que hai que seguir sumando, porque a renovación que iniciou dende a dirección non concluiu. Para esta tarefa considera que atoparse na oposición “veu ben”, malia que a meta segue sendo “gañar” a Presidencia da Xunta no 2009.

Pregunta: ¿Rematou a renovación do partido que anunciou cando asumiu a presidencia?

Resposta: Non, porque un partido tan grande como este, con 160 alcaldías, 700.000 votos e que é o maioritario, non se renova en 15 meses. Pero a renovación non é so de persoas, senón de ideas e actitudes. A nós veunos ben este tempo, nalgún momento iamos sair do Goberno e preferiamos saír desta forma, gañando as eleccións. Agora temos que empregar este tempo na oposición para renovarnos e seguir servindo a Galicia, a ser posible a partir de 2009.

P: Despois dos resultados das eleccións municipais, ¿como queda o PPdeG e como afronta o futuro?

R: É a primeira vez en 23 anos que o PPdeG afronta unhas municipais sendo oposición, e sae co descenso menor en votos dos últimos 16 anos, o que quere dicir que o PP resistiu ben os dous anos de bigoberno e que está moi sólido.

Estes resultados extrapolados ás autonómicas daríannos entre 37 e 39 escanos. Así que o PP sae moi vivo con todas as opcións para seguir optando a unha maioría suficiente para gobernar.

Pactos de goberno: 'O BNG  ten a madurez para pactar co PP'
P: O PP só pode alcanzar o poder con maiorías absolutas, porque non pode pactar con ninguén, ¿iso causa preocupación no partido?

R: É mentira e falso que o PP non estea disposto a pactar. Cousa distinta é que na vida política galega alguén prefira facer de 'camillero' doutro partido, que neste caso é o PSdeG. Iso é un problema estrutural dos nacionalistas galegos, que non acadaron a maioría de idade para facer o que consideran oportuno, respectando os votos.

P: O PP estivo facéndolle chiscadelas ao BNG tralas municipais, ¿poderíase dar un pacto BNG-PP nunha gran cidade sen ter que expulsar aos posibles candidatos?

R: Xa funcionou a experiencia en Vigo na anterior lexislatura, onde sacamos cousas fundamentais con acordos puntuais co Bloque. Cando o PP gañe e teña que completar un goberno estable, eu estou disposto a falar cos nacionalistas co único limite da Constitución. Outra cousa é que neste momento non teñan liderado in madurez para facelo. E o PSdeG sen o Bloque sería unha forza testemuñal.

P: ¿Ten a esperanza o PP de que nesta lexislatura poida haber outro caso como Vigo, e que algunha das coalicións non dure os catro anos?

R: Ao PP o que lle preocupa é que Galicia vaia ben e haxa gobernos estables. As coalicións son meramente interesadas pero non son boas para o país. Hai unha partida de póker na que se aposta Lugo e Pontevedra, e mentres non se solucione Lugo non se solucionará Pontevedra, e viceversa, cun espectáculo dende o punto de vista da democracia lamentable.

Decreto do galego no ensino
P: Un dos temas mais polémicos das últimas semanas é o novo decreto do galego, ¿que pasos dará o PPdeG para intentar modificalo?

R: Nós o que queremos é que os rapaces sexan competitivos, o demais é simplemente enredar e perder de vista o importante. Cando un galego remata os seus estudos ten que coñecer tres idiomas, no só un.

O PPdeG propón tres garantías: o 50% de clases en galego ou castelán, a garantía do dereito dos alumnos a poder dirixirse ó profesor no idioma que queira e a garantía dos pais de elixir a primeira lingua en que vai a aprender a ler un rapaz. Son garantías de dereitos, de liberdades e de bilingüismo cordial. O decreto abre a porta ó monolingüismo.

P: ¿Que aspectos dese novo documento considera menos inaceptables?

R: Hai dúas modificacións no decreto que non estaban pactadas: o feito de que os alumnos teñan que usar o galego en todas as clases que se dean en galego, sen posibilidade de elixir, e, por outro lado, que a lingua educativa se vaia a decidir de acordo co mapa sociolingüístico que faga o Goberno.

Antes, a lingua materna era a dos pais, non a do Goberno. Non se lle poden cercenar os dereitos ós alumnos; os pais son os responsables da educación dos seus fillos, non os gobernos, os pais.

P: Os socios de Goberno din que o PPdeG actúa segundo as directrices que marca Madrid, no Estatuto ou no Decreto do galego...

R: Son críticas recurrentes. Cando Fraga facía un cambio de Goberno sempre se vía en clave madrileña. No Estatuto, eu informei ó presidente nacional do PP despois da reunión, porque o único límite era a Constitución. Do tema do Decreto do galego non falei nin un minuto con Rajoy. Estamos orgullosos de pertencer a un partido que ten un proxecto para España, pero o PPdeG ten un proxecto para Galicia.

'Agora hai unha transferencia por ano. Co PP había seis"
P: Falando do Estatuto, ¿cando se poderá retomar a sua reforma?

R: É sorprendente, nós estabamos dispostos a falar despois das municipais e o presidente da Xunta dixo que non tiña ningún interese en facelo. Incluso os nacionalistas na campaña electoral xa non lle chamaban a Galicia nación, chamábanlle país. Estamos na época dunha maior conxelación da autonomía. Levamos unha por ano, co Partido Popular a media de transferencias era de seis ó ano.

P: Na elección do Valedor do Pobo e na renovación do Consello de Contas sí se alcanzou un consenso.

R: Si, hai consenso porque se buscou o consenso. No caso do Estatuto e do decreto do galego non pasou o mesmo. Cando hai respecto entre as forzas políticas hai acordo, pero non se non se pode levar a ideoloxía ás aulas. Hai que formar en liberdade ós alumnos, e despois os alumnos libremente terán a súa propia ideoloxía.

Deputación de Lugo: 'A decisión de Barreiro hónrao'
P: En Lugo ¿como se presenta a situación política para o PPdeG despois de perder a Deputación?

R: A decisión de Barreiro é coherente e acertada, Lugo o que necesita é un liderado e unha dedicación especial, creo que a mellor mostra que pode dar alguen é estar as duras e as maduras. E eu creo que Barreiro asume a necesidade de liderar Lugo dende a oposición. Hónrao esa decisión.

P: Barreiro ¿asumiu de maneira voluntaria marcha a Lugo?, porque non parece moi convencido...

R: Iso hai que preguntarllo a el. Despois das municipais falei con todos, fixemos unha valoración e parecía oportuno que cada un asumira a súa responsabilidade. Cando unha persoa é candidato a unha institución tan importante como a Deputación de Lugo, é candidato para gañar e para, aínda gañando, non gobernar.

Cacharro: 'o exercizo nostálxico non é unha prioridade'
P: Cacharro non apoiou na campaña e di que non participou porque non o invitaron. ¿Como influiu esta actitude do presidente provincial nos resultados?

R: É verdade que Cacharro dixo en plena campaña que non tiña nin frío nin calor, que non tiña interese na campaña electoral, e iso descríbese por si só. Pero agora Barreiro é o lider da oposición en Lugo e dentro de seis meses tentaremos revalidar o número de deputados e senadores. O exercizo nostálxico da política está ben cando un se retira pero non é unha prioridade cando se está en plena actividade.

P: Visto o visto, ¿Cacharro terá complicado repetir no Senado?

R: Imos utilizar os procedementos do partido como sempre, as listas para unhas eleccións xerais propóñenas as presidencias provinciais e apróbaas a presidencia autonómica. De todas formas, quero recordar que o señor Cacharro dixo que non tiña ningún interese na campaña electoral anterior.