Sara González. AGN (Santiago).
O curso-proxecto cultural e de investigación 'Aulas no Camiño', organizado pola Universidade de A Coruña, entregou esta mañá en Santiago de Compostela a Insignia de Ouro ao intelectual e artista Isaac Díaz Pardo, a primeira que concede o curso nos seus doce anos de existencia.
Asemade, os 20 alumnos de Humanidades que participaron no curso deste ano, titulado 'Diálogos galego-portugueses nun camiño de identidades', tamén recibiron os seus diplomas "por deixar a pegada da identidade de Galicia por onde pasaron", afirmou o director, Xosé Leira.
Os organizadores de 'Aula no Camiño' afirmaron que "se alguén merecía algunha distinción", esa persoa era Isaac Díaz Pardo, "que é en si mesmo un camiño para coñecer o proceso de memoria e de identidade de Galicia". O intelectual galego amosouse agradecido pola Insignia de Ouro que lle foi concedida, e, en ton de broma, comentou que lla daban "porque eran amigos" e que "non se podía tomar en serio" todo o que dicían del.
Doce anos investigando os Camiños de Santiago
O obxectivo de 'Aulas no Camiño: diálogos galego-portugueses nun camiño de identidades', curso que está a piques de rematar, é o de profundar no estudo da realidade galega e portuguesa que atravesan os camiños de Santiago, a través do estudo de áreas tan diversas como a antropoloxía, a historia, a literatura, o patrimonio ou a análise sociolóxica.
Nos doce anos que leva en funcionamento, 'Aulas no Camiño' xa se desenvolveu en países como Francia, Italia, Alemaña ou a República Checa. A comitiva deste ano, que partiu de Lisboa o pasado 4 de xullo, fixo o itinerario da antiga ruta Perloca Marítima ata chegar onte a Santiago. O derradeiro destino será Fisterra, onde un recital de poesía lle porá fin a esta aventura.
13/07/2007
