O galardón supón un recoñecemento á labor desempeñada polo recoñecido intelectual a prol da defensa dos intereses e do desenvolvemento de Galicia.
Betti Vázquez (Santiago).
O Consello da Xunta aprobou esta mañá a concesión da Medalla de Galicia na súa categoría de Ouro ó recoñecido intelectual Isaac Díaz Pardo, quen foi un dos principais impulsores do grupo Sargadelos.
O galardón, que vén a recoñecer a traxectoria de Díaz Pardo a prol do galeguismo e da difusión da cultura do país, en especial nos eidos da literatura e das belas artes, será entregado o vindeiro 25 de xullo nunha cerimonia solemne, coincidindo coa celebración do Día de Galicia. A homenaxe destaca "o periplo dun home que levou a bandeira da arte galega por tódolos países nos que viviu ou pasou parte da súa vida", tal e como se indicou na reunión de hoxe.
Unha vida dedicada a Galicia
Isaac Díaz Pardo naceu en 1920 na casa da Tumbona, na compostelá Rúa das Hortas. Dende cativo frecuentou o taller do seu pai, Camilo Díaz Baliño, no que se celebraban reunións na órbita das Irmandades da Fala, das que o seu pai era militante activo.
Os sucesos da guerra civil segaron a vida de seu pai cando Díaz Pardo cursaba o bacharelato de proxectaba acceder á Escola de Arquitectura. Pero a contenda trocou os seus plans e levouno primeiro a esconderse para salvar a vida e despois a traballar como rotulista nunha industria coruñesa.
Rematada a guerra, Isaac estudou Belas Artes e en 1942, coa carreira rematada, unha beca permitiulle viaxar a Italia para mostrar o seu talento. Anos despois optou por abandonar a súa dedicación ás artes plásticas e comezou a súa obra ceramista ensaiando con materias primas empregadas no vello Sargadelos, das que conseguiu tirar unha porcelana de moi boa calidade.
No 1955 viaxou á Arxentina por vez primeira, onde atopou o apoio doutros intelectuais galegos exiliados para proxectar a creación dunha serie de empresas recuperadoras da memoria histórica galega, proxectos coma a restauración das fábricas de Sargadelos e de Cerámicas do Castro, que se converteron logo en realidade.
Pero Díaz Pardo cultivou tamén o ensaio e a crítica, cunha produción que no 2003 lle outorgou o Premio das Artes e das Letras de Galicia, un entre moitos dos recoñecementos que o intelectual recibiu polo seu traballo dedicado a Galicia.
Afastado da empresa que fundou
O consello de administración de Cerámicas do Castro, empresa fundada por Isaac Díaz Pardo e Luís Seoane hai xa 60 anos, foi renovado a comezos do ano pasado e deixou fóra ó seu promotor.
Segundo sinalara o propio Díaz Pardo no seu momento, a renovación do consello "tería que producirse tarde ou cedo, porque eu teño unha idade, pero este cambio non se debe a iso, senón ao interese por comerciar co valor e o patrimonio que o nome de Sargadelos supón".
O que non lle quitaron daquela foi a presidencia de Cerámicas de Sargadelos e o patronado da fundación do mesmo nome, cargos que exerceu ata xuño de 2006, cando a xunta de accionistas de Sargadelos celebrou unha reunión na que afondaron os enfrontamentos internos e que culminou coa sinatura da saída de Díaz Pardo e dos seus fillos do grupo empresarial.
Os accionistas argumentaron daquela a necesidade de adaptar a empresa ós novos tempos e a oposición do histórico galeguista a dialogar para afastalo definitivamente dunha entidade da que fora fundador.
05/07/2007
