Segundo o informe da CMT, a nosa comunidade acada unicamente as 6,6 liñas por cada 100 habitantes, e sitúase tamén á cola do estado no referente ó incremento na penetración da banda larga.
Betti Vázquez (Santiago).
Galicia rexistra a peor taxa de penetración do ADSL de España, segundo o informe da Comisión do Mercado das Telecomunicacións (CMT) referente ós datos do 2006. Na análise realizada polo presidente da entidade, Reinaldo Rodríguez, a nosa comunidade conta cunha penetración de 6,6 liñas por cada cen habitantes, menos da metade das acadadas en Madrid e Cataluña, onde a porcentaxe ascende ata as 16,9 liñas/100 habitantes situándose por enriba da penetración calculada para o total estatal, de 11,7 liñas por cada 100 habitantes a finais de ano.
A "pouca evolución" dos prezos do ADSL experimentada en España respecto de anos anteriores tradúcese en que o país posúe unhas tarifas superiores ás da media europea. Segundo indicou Rodríguez durante a presentación do informe, "a tendencia que se detecta é que os prezos están por enriba da media europea en banda larga e non hai unha redución o suficientemente rápida como nos gustaría que houbese".
Baixo incremento
Nos datos da CMT obsérvase que, ó igual que acontece no resto de Europa, existe unha relación notoria entre o nivel de penetración da banda larga e a taxa de crecemento de tal penetración. Así, aquelas provincias de maior penetración no 2005 foron en boa parte dos casos as que rexistraron o maior incremento no presente exercicio, actuando a propia penetración coma un factor de impulso. Unha vez máis, a situación global de Galicia está á cola de España.
A nosa comunidade encaixa tres das súas provincias entre as seis españolas cun menor índice de aumento da penetración da banda larga. Máis aínda. A suma das súas taxas supera unicamente en 1,9 puntos o incremento que Madrid experimentou respecto do ano anterior. Dentro de Galicia é Ourense a provincia que conta co peor índice de penetración, de 2,3 liñas/100 habitantes, o segundo peor rexistro do conxunto estatal.
Telefónica perde mercado
Outro factor que parece influír na penetración da banda larga é o punto de madurez que, segundo as estimacións feitas polo presidente da Comisión, está acadando o mercado das telecomunicacións en España. Isto materialízase na tendencia dos operadores alternativos a invertir nas súas propias infraestruturas, en concreto na desagregación dos bucles de abonado, en detrimento dos proveedores maioristas.
Nesta liña, obsérvase que naquelas provincias onde o peso da entrada ó mercado pola vía de desagregación do bucle é maior, a taxa de penetración da banda larga tamén é maior. En conxunto, o mercado medrou nun 10,8%, mentres Telefónica foi perdendo cota de mercado en acceso a Internet. A multinacional mantén, aínda así, un 66,7% do mercado dos servizos.
04/07/2007
