Xeración Dixital

O novo Plan Galego de Acuicultura elaborado pola Consellería de Pesca permitirá a posta en marcha de 13 novas piscifactorías nas costas galegas e a ampliación doutras 13 xa existentes.

Tres destas ampliacións afectarán a espazos da Rede Natura 2000. Trátase das piscifactorías de Lira, en Carnota; Meirás, en Valdoviño; e Bico da Ran, en Cambados. En conxunto, 55.870 metros cadrados en espazos protexidos.

A Consellería de Pesca xustifica estas ampliacións en que se trata do "mínimo imprescindible para permitir a viabilidade de empresas asentadas e con boas perspectivas de futuro que doutro xeito terían que pechar as instalacións".

Con todo, o novo Plan Acuícola supón un freo á instalación de piscifactorías en zonas de protección ambiental, xa que non permite ningunha nova instalación en terreos protexidos. No antigo Plan Sectorial de 2005, impulsado polo anterior goberno e paralizado polo actual Executivo, prevíase a adxudicación de máis de 650.000 metros cadrados de terreos pertencentes á Rede Natura 2000.

Un dos proxectos máis polémicos, e que foi paralizado, era a planta que Pescanova ía instalar en Cabo Touriñán, e que suporía ocupar 238.000 metros cadrados de espazos de especial protección medio ambiental.

370 millóns de €, 24.000 toneladas de peixe
A superficie total adicada piscifactorías establecida polo plan de Acuicultura, entre as plantas de nova creación e as ampliacións, ascende a 3'17 millóns de metros cadrados en 26 explotacións, un 31% máis que no anterior Plan Sectorial de 2005.

Segundo os datos do propio Plan, a posta en marcha dos 26 proxectos, permitirá acadar unha produción anual de 23.873 toneladas. Tan só a nova planta de Laxe Brava, en Ribeira, producirá 2.156 toneladas anuais de peixe. A súa extensión, 308.000 metros cadrados convértea na granxa acuícola de maior importancia entre todas as que se inclúen no plan.

Pesca calcula que a inversión total para estes proxectos ascenderá a 371,8 millóns de euros. A granxa que requirirá un maior orzamento é a de Lago, no concello lucense de Xove, para a que se prevé un investimento de máis de 43 millóns de euros. As previsións en canto a emprego falan de 2.000 postos de traballo directos, segundo informou no Parlamento o director xeral de Recursos Mariños, Antonio García Elorriaga.

Unha vez feito público o documento, iníciase agora un proceso de 45 días de exposición pública para presentar alegacións, tralo que seguirán os trámites legais necesarios para a súa aprobación.

- Ubicacións das novas piscifactorías

• A Coruña (6): Laxe Brava, en Ribeira; Tal, en Muros; Cabo Cee, en Corcubión; Camelle, en Camariñas; Xandriña, en Camariñas e Vimianzo; Seiruga, en Malpica.
• Lugo (6): Regodola e Morás, en Xove; Gralleira e Sarrido, en Foz; Foxo Longo e Corvo, en Ribadeo.
• Pontevedra (1): Orelludas, en Santa María de Oia.

- Ampliacións de piscifactorías xa existentes:

• A Coruña (7): Couso-Aguiño, en Ribeira; Sera, en Porto do Son; Lira e Quilmas, en Carnota; Merexo, en Muxía; San Felipe, en Ferrol; e Meirás, en Valdoviño.
• Lugo (1): Lago, en Xove.
• Pontevedra (4): Mougás, en Santa María de Oia; Punta dos Patos, en Cangas; Bico da Rán, en Cambados; Punta Moreiras e Ardía, no Grove.

- Ampliacións en terreos da Rede Natura:

• Bico da Ran, Cambados. 40.000 m2 en Rede Natura. Empresa: Acuacría Arosa
• Lira, Carnota. 10.000 m2 en Rede Natura. Empresa: Stolt Sea Farm S.A.
• Meirás, Valdoviño. 5.870 m2 en Rede Natura. Empresa: Luso Hispana de Acuicultura S.L.