Xeración Dixital

O Decreto para regular o uso do galego do ensino foi aprobado hoxe polo Consello da Xunta, pero sen o apoio do PP. O presidente do goberno galego, Emilio Pérez Touriño, dou por roto  "o consenso lingüístico en Galicia" e acusou ao PPdeG de cambiar de postura a última hora e retirar o seu apoio ao texto que pretende regular o uso da lingua na educación.

Na súa intervención trala reunión do Consello da Xunta, Touriño lamentou a actuación do PP e asegurou que "ata a súa entrada na comisión de secretarios o pasado martes, o decreto de ensino en lingua galega estaba rubricado e apoiado polos tres grupos políticos". Segundo Touriño, "é a primeira vez que o PP rompe co Plan de Normalización Lingüística, cun texto que cumpre e se limita a regular o que di o Plan".

Pola contra, Feijoo negou que retirasen o seu apoio ao Decreto, e matizou que "imos seguir apoiando o consenso en política lingüística". Xustificou o seu cambio de postura en que a Xunta remitiu esta mesma mañá o texto definitivo do decreto que se aprobaba horas máis tarde no Consello da Xunta. Feijoo explicou que o seu partido aínda estaba a estudar o texto para comprobar se o seu contido definitivo responde ao acordado.

O líder dos populares galegos condicionou o seu apoio ao Decreto a que o texto inclúa as recomendacións feitas polo Consello Consultivo. Feijoo reclama que se garanta "o dominio e o equilibrio entre o galego e o castelán" no ensino. Asegura que, de non ser así, retirarán o seu apoio definitivamente ao texto.

A lingua ao 50%
O texto do Decreto para o uso e promoción do galego no ensino establece que nas etapas educativas de primaria, ESO e bacharelato, os alumnos recibirán como mínimo a metade das materias en lingua galega. En canto á educación infantil, o profesorado deberá empregar a que sexa a lingua materna da maioría dos nenos da aula.

Establece ademais cales serán as materias que obrigatoriamente se impartirán en lingua galega, e que deberán ser completadas por outras a elección do claustro do profesorado ata completar o cupo do 50%:

• Primaria: matemáticas, coñecemento do medio natural, social e cultural; e educación para a cidadanía e os dereitos humanos.
• Secundaria: ciencias da natureza, xeografía e historia, sociais, matemáticas e educación para a cidadanía.