L-V/Xeración.
O novo goberno de emerxencia palestino tomou hoxe posesión dos seus cargos en Ramala (Cisxordania), logo de que o presidente na Autoridade Nacional Palestina, Mahmoud Abbas destituíse o executivo anterior. O goberno está encabezado polo independente Salam Fayad e composto por outros 10 ministros independentes. Hamas queda fóra do executivo, que controlaba dende as pasadas eleccións. Ademais, Mahmoud Abbas tomou a decisión de ilegalizar Hamas e todas as súas milicias.
O goberno palestino informou de que, a partir de agora, todos os membros de Hamas poderían ser procesados ante un tribunal, ao considerar ao movemento islamista responsable do "golpe militar contra a lexitimidade palestina e as súas institucións". Ademais, o novo primeiro ministro, Salam Fayad, xa anunciou a conxelación das contas bancarias do anterior executivo encabezado polo líder de Hamas, Ismail Haniye.
Pola súa parte un portavoz de Hamás, Ismail Radwan, declarou que consideran "ilexítimo e ilegal" ao novo Goberno de urxencia . "Non o recoñeceremos. Non traballaremos con el", manifestou Radwan.
O equipo de goberno de Fayad, economista con boas relacións con Occidente, asumiu o poder sen o apoio do Parlamento, controlado por Hamas. Isto foi posible trala firma dun decreto especial por parte de Abbas. O presidente da Autoridade Nacional Palestina disolvera o Goberno o pasado xoves, despois de que homes armados de Hamas tomasen o control sobre a franxa de Gaza. O portavoz do presidente asegurou que non dialogarán con "os asasinos que levaron a cabo execucións in situ en Gaza". O diálogo só é posible, concretou, se o movemento se retira das posicións de seguridade de Al Fatah en Gaza e disolve a súa Forza Executiva.
O primeiro ministro israelí, Eduh Olmert, xa fixo público o seu apoio ao novo goberno de emerxencia. "Un Goberno que non sexa de Hamás é un interlocutor para a paz", indicou Olmert á prensa, antes de iniciar a súa viaxe cara a Estados Unidos, onde se reunirá co presidente George W. Bush. "Nos últimos días creouse unha realidade que non coñecemos durante os longos esforzos diplomáticos da Autoridade Palestina, e temos a intención de traballar con todas as nosas forzas para aproveitar a oportunidade que se presenta", explicou Olmert.
17/06/2007
