AGN (Santiago).
O secretario xeral do PSdeG-PSOE e presidente da Xunta, Emilio Pérez Touriño, propén á Comisión Federal de Listas do seu partido as candidaturas de Salvador Fernández Moreda e de José Ramón Gómez Besteiro á presidencia das Deputacións Provinciais da Coruña e de Lugo, respectivamente.
Salvador Fernández Moreda, economista e concelleiro na cidade da Coruña, preside xa actualmente a Deputación da Coruña, cargo que ocupou tamén entre 1991 e 1995.
José Ramón Gómez Besteiro, pola súa banda, é avogado e secretario xeral da Agrupación Local dos Socialistas de Lugo. Concelleiro na cidade das murallas, na pasada lexislatura foi delegado de Urbanismo no concello e tamén deputado provincial.
Esta é a proposta final da executiva socialista galega, trasladada á Comisión Federal de Listas do partido. A designación oficial dos candidatos terá lugar mañá, para ser logo ratificada polo comité federal do PSOE.
17/06/2007
