Xeración Dixital

A xeopolítica e xeoestratexia global víronse sacudidas cando ao final da década dos anos oitenta do século pasado, e cando os fastos polo corenta aniversario da creación da República Democrática Alemana non o facían en modo algún predicíbel, o muro de Berlín fica esmorecido, levando finalmente á desarticulación do que fora o mítico inimigo do Occidente democrático e capitalista.

O mundo bipolar fenecera, erixíase así o que o pai do actual mandatario estadounidense denominaría a new world order, cunha única superpotencia mundial destinada a cumprir o que os oráculos entreviran nas súas matinacións místicas, o fin da historia, a consecución do ansiado mundo feliz.

Case vinte anos despois de aquel estalido de xúbilo, daquela fe nun futuro que se presentaba aos ollos do orbe como brillante e esperanzador, que traería a paz e a prosperidade a unha nacente aldea global, ata o de entón atenazada pelo terror dunha terceira guerra mundial de carácter aniquilador, a realidade e a prospección de futuro non poden ser máis escuras e desesperantes. Sendo de significar o feito de que a queda do muro que dividiu á Alemaña, e por ende á Europa, traería consigo a elevación de outros novos, que sempre se albiscaran, mas que agora se facían máis visíbeis ca nunca.

A guerra fría deu paso á guerra de cuarta xeración, a unha nova configuración do conflito armado que, abandonando as formas e normas clásicas do que Clausewitz entendía como unha outra maneira de praxe política, conduciunos a esta realidade que vivimos, complexa por exceso de actores e escenarios, rompendo un xogo de xadrez, no que ata fai só vinte anos, só había, a grandes trazos, dous contrincantes. A nova conflagración converteuse así en hiperreal, caracteriza por unha sucesión mediática de fitos marcados por letras e números, con aparentes conexións que se configuran como historia do presente.

É esta complexidade a que, coa colaboración do Instituto Galego de Estudos de Seguranza e da Paz, se pretende analizar nas colaboracións do espazo A Fiestra. Se ha anos a análise de temáticas relacionadas coa seguranza e a defensa tiñan unha única compoñente de carácter simplemente político, hoxe necesítase de unha abordaxe ben máis ampla, de carácter multifactorial e multidisciplinar, dado que, por unha banda, son múltiples as variables que concorren na actual situación das problemáticas ligadas á defensa e seguranza internacional, e por outra, e debido ao anterior, isto obriga a unha sinerxía analítica provinte das máis variadas disciplinas, sen esquecer a perentoriedade dun tratamento holístico que nos permita obter unha composición de lugar completa e non só parcial.

Por tanto, serán tres os eixes que articularán cada semana estas intervencións, un primeiro dedicado a desbravar as actuais políticas de defensa e seguranza internacional, de modo que estas se viren acesíbeis en toda a súa integridade, e non só, xa que a prospectiva sobre as mesmas darán unha visión máis ou menos clara do que se pode agardar da súa posta en escena. O segundo eixe tratará de botar luz sobre o amplo mosaico de conflitos esquecidos, pescudando na cromática variedade das súas motivacións, así como na súa situación na altura. E por último, unha das temáticas máis candentes na actualidade, a participación da muller no conflito armado, ben sexa no clásico rol de víctima, como elemento combatente, ou como parte das actuais ententes civís-militares que, baixo o auspicio das Nacións Unidas, visan unha solución final aos numerosos e devastadores enfrontamentos armados que inzan o noso mundo.