Ana Conde. Nova+ (Santiago).
O endebedamento é unha práctica cada vez máis habitual nos gobernos locais, se ben ás veces os pagos atrasados dispáranse e ameazan a saúde financeira das corporacións. A débeda acumulada das sete principais cidades galegas ascende a 330 millóns de euros, o que equivale o 40% dos seus orzamentos para 2007.
Os dous concellos máis hipotecados son A Coruña e Vigo, as urbes máis grandes e cos maiores fondos do país. Pero se abultadas son as súas contas, tamén o é a débeda vida que as sostén.
Así, A Coruña lidera este 'ranking' con débedas por valor de 75'8 millóns de euros, cando o seu orzamento, 192 millóns, é o segundo máis elevado de Galicia. Vigo, con 66'5 millóns hipotecados é o concello máis rico cun orzamento prorrogado dende 2003 de 212 millóns de euros.
Malia todo, chaman a atención os casos de Ourense e Ferrol. Se atendemos ós datos relativos, as súas débedas ascendían a finais do ano pasado a 52 e 46 millóns respectivamente, é dicir o 63% e o 50% dos seus orzamentos para o 2007.
Inversións estrela e amortización a longo prazos
As hipotecas que as cidades solicitan cada ano adoitan destinarse a inversións, especialmente ó capítulo de infraestruturas. Obras que absorben grandes partidas son o saneamento ou a realización de xardíns e prazas.
Malia isto, os responsables de economía dos concellos destacan que sempre hai períodos concretos nos que os concellos adquiren importantes débedas, normalmente adicadas a inversións estrelas. No caso de Lugo, por exemplo, o Concello solicitou un crédito de seis millóns de euros para a construción do Museo Interactivo da Historia da cidade.
En conxunto, as cidades galegas teñen previsto investir máis do 6% das súas contas en reducir o endebedamento, un total de 57 millóns de euros. Con todo, os responsables de Economía e Facenda de cada una delas nega que a situación sexa preocupante, dado que a lei permite un coeficiente de débeda ata do 110%.
Por exemplo, o responsable en funcións da Facenda de Santiago, Carlos Nieves, indica que a débeda -32 millóns a finais de 2006- é asumible. “O concello ten unha credibilidade financeira moi importante, dando resposta ós provedores en tres ou catro meses”. O mesmo discurso que repiten un por un os encargados de xestionar os fondos municipais.
Plans de saneamento
A pesar diso, en máis dunha ocasión a situación tórnase complicada e non queda outra alternativa que apertar o cinto. Disto sabe moito José Manuel Rey, concelleiro en funcións de economía de Ferrol, cidade que reduciu case á metade a súa débeda en catro anos. O plan de saneamento, supervisado pola Xunta, conseguiu baixar os 40 millóns do 2003 ata os 24'5 actuais. Segundo Rey, a situación chegou a ser insostible, ata o punto de que no ano 2005, a débeda superou ó orzamento anual.
Tamén o Concello de Vigo levou a cabo un ambicioso plan de saneamento que rebaixou a débeda viva case á metade, pasando de 108 millóns a 66 en catro anos.
Para o catedrático de Economía aplicada da USC Luis Caramés, o saneamento logrado en Ferrol e en Vigo é “espectacular” pero sinala que son a excepción pois “ós políticos non lles gustan moito estas cuestións”. Caramés sinala que se os concellos non conseguen vender ben o plan de saneamento, “os cidadáns poden pensar que non se fixo nada”. Quen sabe se isto ten algo que ver con que o PP perdese as alcaldías de Ferrol e Vigo...
14/06/2007
