Xeración Dixital

A conselleira de Educación, Laura Sánchez Piñón, informou hoxe que ata o curso 2009-2010 incorporaranse á ensinanza infantil e primaria máis de 1.000 novos mestres. A decisión é froito do convenio para a mellora da calidade ó que chegou esta tarde a Administración cos sindicatos, que coincidiron en sinalar que se trata dun acordo histórico.

A medida, que o Sindicato de Traballadores do Ensino de Galicia (STEG) non chegou a firmar, suporá pasar dos 14.700 mestres que actualmente traballan nas dúas etapas a preto de 16.000, cun incremento que se sitúa en torno o 7%.

O convenio contempla tamén outros acordos de interese, como o horario lectivo dos mestres, que pasa das 25 ás 21 horas semanais, mentres que o horario fixo de permanencia semanal no centro baixa das 30 ás 25 horas.

Ó mesmo tempo, o documento inclúe a ampliación dos posto de especialistas de orientación e pedagóxica terapéutica e de audición e linguaxe, para mellorar neste caso a atención á diversidade e do alumnado con necesidades específicas. En concreto haberá 130 novos orientadores, que se sumarán ós 243 existentes.

Un titor por unidade
En virtude do acordo firmado entre Educación e CIG-Ensino, CC.OO., FETE-UGT, ANPE e CSI-CSIF, aplicaráse o principio xeral de que cada unidade teña un titor ou un mestres xeneralista, o que conlevará a ampliación de postos de traballo en educación primaria nos centros que o precisen.

Houbo unanimidade entre as centrais á hora de recoñecer que o convenio mellora as condicións dos mestres e que supón un paso "significativo" para que os docentes igualen as súas condicións laborais coas de secundaria, dacordo neste último caso co secretariado nacional de CIG-Ensino.