Xeración Dixital

A conselleira de Política Territorial, María José Caride, amosouse hoxe convencida de que o estudo do Adif sobre o trazado do AVE por Serrabal é "rigoroso". Caride asegurou ter confianza en que, segundo este estudo, o actual proxecto do AVE Santiago-Ourense terá unha afectación mínima sobre a explotación "e os empregos poderanse garantir durante 48 anos".

Con esta visión enriba da mesa, a titular de Política Territorial non deixou entrever que se vaia producir un cambio de trazado, aínda que lembrou que a decisión está en mans do Ministerio de Fomento, que onte amosou, en verbas de Caride, "unha sensibilidade para atender os problemas dos traballadores".

A conselleira considera que a disposición amosada onte polo Adif para analizar o seu estudo cos técnicos dos sindicatos procede de que "tal é o seu convencemento de que é rigoroso, que está disposto a constratalo" cos representantes da plantilla da mina.

En declaracións aos medios de comunicación en Santiago, Caride instou a que "definitivamente se tome unha decisión sobre este trazado" que garanta que non se van producir retrasos significativos na súa posta en funcionamento.

Un estudo independente
Pola súa banda, o conselleiro de Innovación e Industria, Fernando Blanco, pediu esta mañá ás centrais sindicais e ao ente público Adif que asuman a valoración final que realicen os técnicos sobre a afectación do trazado do AVE á mina de Serrabal.

Asegurou que dende a Consellería "estamos moi satisfeitos" polo acordo acadado onte no que se decidiu realizar un novo informe independente durante esta semana que clarifique a afectación real do paso do AVE pola mina. Blanco advertiu que "no momento en que ese estudo estea feito todos debemos ser responsables", e insistiu en que "os informes que todos temos son obxectivos, pero todos teremos que asumir o resultado independente dese estudo".

O titular de Innovación incidiu en que "os traballadores e a propia empresa teñen capacidade para poñer técnicos independentes", que realicen "unha análise para saber cal é o grao de afección real" do trazado que defende o Ministerio de Fomento sobre a mina de cuarzo.