Xeración Dixital

Nun comunicado que publica a páxina web do diario Berria, a banda terrorista ETA anuncia que rompe o cese de foto a partir da medianoite do martes e que reabre a "actividade en todas as súas frontes". ETA argumenta que “non se dan as condicións mínimas para seguir co proceso de negociación, con pseudo-solucións que non chegan a ningún sitio”.

ETA declarou o 22 de marzo do 2006 un cese de fogo permanente que mantivo formalmente ata hoxe, pero que rompeu na práctica no mes de decembro co atentado na T-4 do aeroporto de  Barajas que se levou a vida de dúas persoas. Esta noite, a banda volveu difundir un novo comunicado no que acusa ó goberno de Zapatero de "respostar ó paro das accións armadas con detencións, torturas e persecucións" e de "ter convertido o seu talante en fascismo que deixan ós cidadáns e ós partidos sen dereitos".

ETA tamén fai referencia ó PNV, que foi branco das súas críticas nos últimos meses. Acúsao de "mentir cando debe defender a Euskal Herria. (...) Caéuselle a careta" e reafirma a súa vontade de seguir "loitando" ata conseguir a independencia para o País Vasco..

Avisos nas últimas semanas
Nos últimos días, os servicios antiterroristas do Ministerio de Interior e do Goberno vasco xa avisaran da posibilidade de que ETA comunicase a súa volta ás armas. O anuncio de hoxe prodúcese tras meses nos que a banda escenificara unha revitalización da súa actividade, co roubo de diversas armas en Francia ou coa restructuración do comando Donosti que foi desarticulado a finais de marzo.

O pasado fin de semana trascendeu ós medios que empresarios vascos recibiran cartas de extorsión solicitando aportacións de 150.000 euros. Mesmo se o reclamo do chamado "imposto revolucionario" non cesou dende o inicio da tregua, desta vez fíxose especial fincapé no número de destinatarios das cartas, moito máis elevado que en ocasións anteriores.

Atentado en Barajas, o punto de inflexión
O 'proceso de paz' sufríu numerosos altibaxos dende o anuncio de ETA, pero entrou en vía morta o 30 de decembro, cando estouraba unha bomba no parking da Terminal 4 do aeroporto de Barajas, que se levaba a vida de Carlos Alonso Palate e Diego Armando Estacio.

Este atentado imposibilitaba calquera tipo de acordo con ETA, tal como recoñeceu José L. Rodríguez Zapatero, mesmo se un comunicado nove días despois a banda reafirmaba a vixencia do cese de fogo.

Nunha recente entrevista ó diario Gara, ETA xustificaba a bomba de Barajas como "unha resposta ós ataques permanentes ó goberno español (...). A nosa intención foi influir para que o proceso avance con bases máis sólidas". Dende a banda terrorista incluso se chegou a culpar ás forzas de seguridade pola tardanza en evacuar o parking tralo aviso de bomba.