Jacobo Rey. AGN (Santiago).
A consellería de Sanidade confirmou unha "tendencia á estabilización" do SIDA en Galicia, despois de que este ano se diagnosticaran 84 novos casos desta enfermidade no noso país.
Segundo os datos do departamento que dirixe María José Rubio certifican "un descenso continuado no número de casos novos de enfermidade" dende 1997. O primeiro caso de SIDA detectouse en Galicia no ano 1981, e dende entón rexistráronse 3.556 novos enfermos.
Sanidade explica a baixada polos "esforzos preventivos" levados a cabo pola Administración nos últimos anos, que son "a mellor estratexia de control" debido a inexistencia de vacinas ou tratamentos. Ademais, o descenso de contaxio non se traduce na diminución da poboación afectada, porque se incrementou a esperanza de vida dos enfermos.
A idade media de contaxio do VIH mantense entre os 25 e os 39 anos, e a principal causa é compartir o material de inxección para a administración de drogas. Tamén se detecta un ascenso de contaxios por relacións heterosexuais non protexidas.
02/06/2007
