Xeración Dixital

Os mariscadores de Ferrol e os membros do Comité Cidadán de Emerxencia da Ría piden que se abra unha mesa de conversas con representantes políticos, para poder explicar as súas demandas e as súas actuacións en contra da planta gaseira. Na asemblea desta mañá, os mariñeiros decidiron abrir unha tregua nas mobilizacións na rúa para empezar a traballar unha ronda de conversas. Só teñen unha esixencia, que en calquera mesa de diálogo estea presente o patrón maior, Bernardo Bastida, preso dende onte no cárcere de Teixeiro.

Trala asemblea de hoxe esperábase un recrudecemento das mobilizacións dos mariscadores, en protesta pola carga policial de onte e pola dura condena de prisión sen fianza dictada contra o patrón maior. Pero non foi así. Os mariscadores anunciaron unha tregua e pediron diálogo coas autoridades. Para o vindeiro domingo convocaron aos cidadáns a unha manifestación no peirao de Ferrol. 

Inicio das conversas
Unha delegación dos mariñeiros e do Comité de Emerxencia dirixiuse ao Pleno do concello con intención de explicar ante os representantes políticos o que onte sucedera no peirao das Curuxeiras. Querían expoñer  os seus motivos para mobilizarse contra Reganosa, xa que temen que a actividade da planta gaseira afecte aos bancos marisqueiros e á súa actividade laboral.

O alcalde en funcións, Juan Juncal, non permitiu que a delegación de mariscadores intervise no Pleno, pero comprometeuse a reunirse con eles para escoitar as súas demandas. Momentos despois, os mariñeiros iniciaron unha ronda de conversas coas formacións políticas na que xa se reuniron con representantes de Esquerda Unida e do Bloque Nacionalista Galego.

Os mariscadores pediron a intervención dos representantes políticos para que se deixe en liberdade ao patrón maior da confraría, Bernardo Bastida, que onte á noite ingresou no cárcere de Teixeiro sen posibilidade de fianza. Está acusado de de desobediencia, ameazas, coaccións e desorde pública.

Como resultado desta xunzanza, Esquerda Unida xa pediu que Bastida sexa posto en liberdade e condicionou un posible pacto de goberno no concello de Ferrol a que o candidado socialista, Vicente Irisarri, se pronuncie sobre a brutal carga policial que onde se produciu contra os manifestantes.

Vídeo dos sucesos do 30 de maio en Ferrol, na páxina do Comité Cidadán